ახალი სიმღერები-ძაღლის სიმღერა

კუსა ისე მოვიდა, როგორც ცუგი. ეგ იყო, რომ ცუგი ჩემმა მეგობარმა უფრო შემოიფარა, ვიდრე მე – რადგან მე იქით შესაფარებელი ვიყავი მაშინ. შესაბამისად, მე და ცუგი გვიან დავმეგობრდით. კუსა კი წელიწადია რაც მესტუმრა. ცალ ფეხს საერთოდ ვერ დგამდა მიწაზე. ძალიან შეშინებული იყო. მცემესო კუსამ და შენიც მეშინიაო. საჭმელს რომ მაწვდი, მგონია, რომ წიხლი უნდა მოაყოლოო. და გარბოდა. თავიდან, ვიფიქრე, გავაჩუქებ მეთქი – ცალკე ჩემი შინაგანი ძალა რამდენად გაწვდებოდა ორ ძაღლს არ ვიცოდი და ცალკე ცუგი როგორ იგუებდა. არვინ იჩუქა. კუსა ცხოვრობდა ჭიშკართან. საჭმელს ვდებდი და მე თვალს ვეფარებოდი. ის ფრთხილად მოდიოდა და ჭამდა. ხელი პირველად ორი კვირის შემდეგ ჩამოვართვით ერთმანეთს. ,,გიორგი” – ვუთხარი ძაღლს ჩემი სახელი. ძაღლი დაიბნა. აღარ ახსოვდა რა ერქვა. ,,მაშინ დაგარქმევ სახელს, რომელიც ბაშვობისას მეგონა, რომ ყველა ძაღლს ერქვა – კუსას.” და მე და კუსა დავმეგობრდით. ცუგი და კუსაც. ცუგი – ჰასკია. კუსა – მეტისი. ახლა ის უკვე ჩვენთან ცხოვრობს. ფეხიც მოურჩა და შიშიც.