დამოუკიდებლობის დღე

ხვალ დამოუკიდებლობის დღე დადგება. ბოლო ორი წელია ეს დღე უცნაურად თუ საცნაურად გადაეჯაჭვა ევროპას და ევროპულობის იდეას ჩემს სამშობლოში. შარშან, ამ დღეს, რუსთაველზე ლექცია წავიკითხე – ,,ევროპის დაბრუნება საქართველოში”. და ვთქვი, რომ საქართველო არსად არ გაქცეულა საკუთარი სურვილით – სისხლით მოწყვიტეს სივრცეს, რომელთანაც ანტიკური და ქრისტიანული წარსული კრავდა, რომელთანაც გრიგოლ ხანძთელი და შოთა რუსთაველი, დავით გურამიშვილი და სულხან–საბა ორბელიანი, სოლომონ დოდაშვილი და ნიკოლოზ ბარათაშვილი, ილია ჭავჭავაძე და ვაჟა-ფშაველა, ნიკო ნიკოლაძე და ივანე მაჩაბელი, მარო მაყაშვილი და ივანე ჯავახიშვილი – ეს ყველა დროის უდიდესი ქართველები – აკავშირებდა და ჩამოსათვლელი რომ უფრო გრძელია – ვიცი. მოწყვიტეს და ზოგი უცნაური ადამიანი დღესაც გვაჯერებს, რომ კრემლის საზარელი ჩრდილია ჩვენი აუცილებელი სახურავი.